لمَا عيونك سألت عني .. ليه غيّرت مدار عينيك
قصدك تعذيب والله تجنـّي والله منو البيطول عاليك
والله بتسجـن فرحك جوّه وتعمل ناسي وما هاميك
بحر الشوق الهادر فيها وخايف شوق الشوق يشقيك
ليه خاصمت النظرة الحلوة وليه غيرت ملامحك ديك
اصلك دايما مرات تـقسا وتبقى حنيـّن منك وليك
ليه اخفيت اللهفة الفيها وحبك لي باين في وشيك
لهفة بتظهر فوق حاجبيها وفي نظراتك وفوق خديك
ألحق أقطف لهفة فرحك قبال تصبح من ماضيك
وافرش بيها دروب الريدة وشيل الشوك شان ما يازيك
أصلو الشوق الكامن فيها نور قلبي وعاكس فيك
ومالك يعني الريدة حرام؟ والله احساسي ده ما كافيك
ليه بتحاول تبعد اكتر وكل ما ليك تسرع في مشيك
وتكتل فينا الأمل الخدّر ونخسر حبنا بي ايديك
وتهدم قصر احلامي العالي وانا شـيدتـو عشان يحميك
وتخزل قلبا ناضل فيك وفوق جمرالاشواق راجيك
كل ما اقرّب منك تبعد صابر قلبي ومستـنيك
بكره طريقك يعرف دربي باكر قلبك ليْ يهديك
ويبقى مدارك جو مداري وبي حنية يلف يطويك
وابقى شريكة عمرك كلو وتبقى اعز واغلي شريك
وأملا معاك الدنيا سعادة ومن كاسات الهنا أسقيك
وتاني البسمة تعود من تاني اسرح وامرح في واديك
أرجوك قرب من خطواتي وانا خطواتي دروبا عليك
خلي عيونك تحكي اشواقا سـيـبا دموعا تكب ترويك
أفضح حبك وما تـنضارى غـنـّي ليّ وأكون شاديك
تبقى الدايما غالي عليّ واكون انا جوا سواد عينيك
وتصبح قصة ريدنا رواية (مدار اللهفة) يلف حوليك
ما من طبعك تجرح قلبي وما من طبعي انا اقسا عليك
عارفاك انت حنيـّن طبعك وحِنـّي انا ليك حنان والديك
ليست هناك تعليقات:
إرسال تعليق